మోడీ కాంగ్రెస్ పార్టీలో చేరారు

మోడీ కాంగ్రెస్ పార్టీలో చేరారు

ప్రధానమంత్రి నరేంద్ర మోడీ కాంగ్రెస్ లో చేరారు. మోడీ అంటే మోడీ కాదు. చూపులకే కాదు ఆహార్యం, మాట్లాడే తీరు అచ్చు గుద్దినట్టు ఉండే అభినందన్ పాఠక్ హస్తం పార్టీ కండువా కప్పుకున్నారు. ఇన్నాళ్లూ ఈయన బీజేపీ మిత్రపక్షం రిపబ్లికన్ పార్టీ ఆఫ్ ఇండియా ఉత్తర్ ప్రదేశ్ రాష్ట్ర ఉపాధ్యక్షుడిగా ఉన్నారు. గత నెలలోనే పాఠక్ యుపి కాంగ్రెస్ నేత రాజ్ బబ్బర్ సమక్షంలో ఆ పార్టీ తీర్థం పుచ్చుకున్నారు. ప్రస్తుతం ఎన్నికలు జరగనున్న చత్తీస్‌గఢ్‌లో బీజేపీకి వ్యతిరేకంగా ప్రచారం చేస్తున్నారు. మోడీ పాలనలో ఇక అచ్చే దిన్ రావని అభినందన్ అంటున్నారు. 

మోడీ మాదిరిగానే అభినందన్ కూడా అదే తీరుగా మిత్రో అని ప్రసంగిస్తారు. తనని చూసినప్పుడల్లా చాలా మంది అచ్ఛే దిన్ ఎప్పుడొస్తాయని ప్రశ్నిస్తే సమాధానం దొరకక పార్టీ మారినట్టు పాఠక్ చెప్పారు. ప్రస్తుతం చత్తీస్‌గఢ్‌లోని జగ్‌దల్‌పూర్, దంతేవాడా, కొండగావ్, బస్తర్ ప్రాంతాల్లో కాంగ్రెస్ తరఫున ఈయన ప్రచారం చేస్తున్నారు. మోడీ సర్కార్‌పై విమర్శనాస్త్రాలు సంధిస్తున్న అభినందన్‌ను చూసిన ప్రజలు సెల్ఫీలు దిగేందుకు పోటీపడుతున్నారు. 

ప్రచారం సందర్భంగా అభినందన్ మోడీ స్టైల్‌లోనే మిత్రో అంటూ తన ప్రసంగాన్ని ప్రారంభిస్తారు. మోడీ హావభావాలనే ప్రదర్శిస్తూ ప్రజలను విపరీతంగా ఆకట్టుకుంటున్నారు. మంచిరోజులు ఎక్కడ అని ప్రశ్నిస్తూ... 15 లక్షల రూపాయలు ప్రతి భారతీయుడి అకౌంట్‌లో వేస్తామని చెప్పి మాటతప్పారని విమర్శలు గుప్పిస్తున్నారు. అచ్ఛేదిన్ ఇక రావని చెప్పేందుకు తాను వచ్చినట్లు చెబుతున్నారు. మోడీవన్నీ తప్పుడు వాగ్దానాలేనని, కాంగ్రెస్‌కు ఓటేసి అభివృద్ధికి తోడ్పడాలని ఆయన కోరుతున్నారు. 2014 తర్వాత ఇప్పటి వరకు తాను బీజేపీకి తప్ప మరో పార్టీకి ప్రచారం చేయలేదని చెప్పిన అభినందన్ తొలిసారిగా తాను బీజేపీయేతర పార్టీకి ప్రచారం చేస్తున్నట్లు తెలిపారు.