ఇటలీలో కరోనా వ్యాప్తికి ఆ చిన్న పొరపాటే కారణమా? 

ఇటలీలో కరోనా వైరస్ వ్యాప్తి దారుణంగా ఉన్నది.  ఆ దేశాన్ని ఈ వైరస్ అతలాకుతలం చేస్తున్న సంగతి తెలిసిందే.  కరోనా ప్రాభవం వలన ఇప్పటి వరకు 1300 మందికి పైగా మరణించారు.  జనవరిలోనే ఈ వైరస్ ను అక్కడ గుర్తించారు.  వైరస్ ను గుర్తించిన వెంటనే అక్కడి ప్రభుత్వం చర్యలు తీసుకుంది.  ప్రయాణాలపై ఆంక్షలు విధించింది.  అయినప్పటికీ కరోనా ఈ స్థాయిలో ఇటలీలో వ్యాపించడానికి కారణం ఏంటి... ఎక్కడ పొరపాటు జరిగింది. తెలుసుకుందాం. 

జనవరి 29 వ తేదీన ఇటలీలో రెండు కరోనా కేసులను కనుగొన్నారు.  ఆ తరువాత వెంటనే ఆరు నెలల పాటు అత్యవసర పరిస్థితిని ప్రకటించారు.  ఆ రెండు కేసులను పరిగణలోకి తీసుకొని చైనా నుంచి వచ్చే విమానాల రాకపోకలను నిషేదించారు.  కానీ, 20 రోజుల్లో పరిస్థితి మొత్తం తలక్రిందులైంది.  దీనికి కారణం ఉన్నది.  జనవరి 29 వ తేదీన రెండు కేసులు నమోదుకాగా, మూడో కేసు ఫిబ్రవరి 18 వ తేదీన కోడోగ్నో పట్టణంలో కనుగొన్నారు.  అయితే, దానిని సాధారణ ఫ్లూ అని అనుకోని డాక్టర్లు పెద్దగా పట్టించుకోలేదు.  ఆ విధంగానే ట్రీట్మెంట్ చేశారు.  కరోనా వచ్చిన వ్యక్తి ఇంటికి వెళ్లారు.  

ఆ తరువాత ఫ్లూ లక్షణాలతో పదుల సంఖ్యలో హాస్పిటల్స్  లో జాయిన్ అయ్యారు.  పరిస్థితి అర్ధం చేసుకొని కరోనా వ్యాధిని గుర్తించే సమయానికి జరగాల్సిన నష్టం జరిగిపోయింది.  ఫిబ్రవరి 23 వ తేదీన కోడోగ్నో పట్టణంలో రెండు మరణాలు సంభవించాయి.  ఈ రెండు మరణాలతో అక్కడి ప్రభుత్వాలు అలర్ట్ అయ్యాయి.  మొదట పట్టణాలను నిర్బంధంలోకి తీసుకున్న ప్రభుత్వం ఇప్పుడు దేశం మొత్తాన్ని నిర్బంధంలోకి తీసుకొచ్చింది.  కోడోగ్నో పట్టణంలో ఫ్లూతో వచ్చిన వ్యక్తిని సరిగ్గా ట్రీట్మెంట్ చేసి ఉంటె ఈరోజున ఇటలీ ఈ స్థాయిలో ఇబ్బందులు పడేది కాదని చెప్పొచ్చు.